PAZ PARA SEMPRE - Claudio Rodríguez Fer

Poesía para hoxe día de “GALICIA MÁRTIR” 17 de agosto 2011.

Leido por Antonio Monroy , fillo de Adolfo Monroy asasinado no 1936

Autor: Claudio Rodríguez Fer

PAZ PARA SEMPRE

(inscrición)

Perseguíronos con saña.

Detivéronos con sevicia.

Torturáronos con sadismo.

Encarceráranos sen causa.

Xulgáronos sen xustiza.

Paseáronos sin piedade.

Así os mataron.

E impuxeron o terror.

E impuxeron a calumnia.

E impuxeron a falsificación.

E impuxeron a censura.

E impuxeron o silencio.

E impuxeron o esquecemento.

E así trataron de rematalos.

Contra o exterminio atroz

Das súas vidas desfeitas

E contra o esquecemento inxusto

Do silencio cómplice

Queremos sentir viva para sempre

a memoria galega

das vitimas do fascismo,

En solidariedade

Con todas as comunidades do mundo

Que padecesen calquera ditadura do terror.

Porque como aquelas vítimas

queremos liberdade para sempre.

Porque por aquelas vítimas

Para sempre queremos xustiza.

Porque a realidade é o desexo,

PAZ PARA SEMPRE.